I riu nga Vlora e Shqipërisë, Dean Çelaj, është renditur në listën e Forbes mes 30 njerëzve më të suksesshëm dhe me influencë ndërkombëtare nën 30 vjeç gjatë vitit 2022.
Themeluesi i platformës Akademi.al, që rezultoi tejet efektive gjatë periudhës së pandemisë, Dean Çelaj, tregon për Atlantikun për jetën dhe shkollimin e tij.
“Unë kam lindur në vitin 1997 në Vlorë, Shqipëri, në mes të Luftës Civile Shqiptare. U transferova në Mbretërinë e Bashkuar për të arsimim më të mirë në moshën 15-vjeçare, por vendosa të kthehem dhe të kontribuoj në vendin tim (Shqipëri) pasi u diplomova me një bachelor në shkencë nga University College London (UCL). Unë gjithashtu kam një diplomë master nga Universiteti i Harvardit” thotë Çelaj.
Zgjedhja mes 30 personave me impaktin më të madh social në vitin 2022 nga revista prestigjioze “Forbes”, gëzoi Çelajn për faktin se po i njihej kontributi për shtetin prej nga ky vjen.
“Ishte një lajm i mrekullueshëm, veçanërisht sepse po vlerësohesha për kontributin tim në sektorin e arsimit në shtëpi dhe ndikimin masiv social që patëm gjatë pandemisë COVID-19.”
Por, cilat ishin pritjet e tij kur themeloi platformën, që tashmë ka përmasa gjigante në Shqipëri, Kosovë dhe Maqedoninë e Veriut?
“Kur e hapa Akademi.al, ëndërroja shumë. Doja të krijoja një platformë që do t’u mundësonte të gjithë studentëve shqipfolës në mbarë botën të kenë akses falas në një arsim të shkëlqyer. Pandemia e përshpejtoi atë masivisht.”
Aktualisht Akademi.al ka rreth 545,000 përdorues dhe 20,000 video edukative në gjuhën shqipe.
Këto numra bënë që platforma e Çelajt të përdorët edhe nga 1300 shkolla publike në Shqipëri.
“Akademi.al është një platformë e-learning e ngjashme me Khan Academy dhe Google Classroom, por të bashkuara. Ofron 20,000 video mësime falas në gjuhën shqipe nga mësuesit më të mirë që mund t’i shikojnë në çdo kohë mbi 500,000 studentë të regjistruar. Nga ana tjetër, është një sistem i menaxhimit të mësimit i përdorur nga 1300 shkolla publike në Shqipëri, që lehtëson të gjitha aktivitetet e mësimit në distancë, përfshirë videokonferencat.”
Megjithëkëtë sukses, përfundimi i pandemisë dhe kthimi i mësimit në shkolla mund të jetë shkak që platforma t’i humbasë përdoruesit e saj.
Mirëpo edhe për këtë, i riu nga Shqipëria ka një ide se si të mbajë platformen e tij të sukssesshme.
“91% e studentëve shqiptarë iu drejtuan Akademi.al gjatë COVID-19. Ne patëm një nga përgjigjet më të mira të COVID në botë. Fatkeqësisht, pas përfundimit të pandemisë, mësimi në internet spo mbahet dhe përparimi do të humbasë nëse nuk ndërhyjmë. Po kërkoj të gjej mënyra të reja që qeveria miraton mësimin online si pjesë e kurrikulës zyrtare, për të komplimentuar mësimin në klasë, si në vendet më të zhvilluara si SHBA”
Ky tregon për Atlantiku.com se cilat janë sfidat më të mëdha të mësimit në distancë në Shqipëri, Kosovë dhe Maqedoni të Veriut.
“Sipas mendimit tim, është një politikë e vjetëruar dhe mungesë e përgjithshme e iniciativës. Sigurisht, infrastruktura, mungesa e pajisjeve dhe mungesa e internetit do të jenë gjithmonë një problem masiv, por iniciativa është numër një.”
Atlantiku ka dëgjuar për disa ankesa të nxënësve të cilët nuk i kanë pajisjet e duhura që të angazhohen në mësimin në distancë.
Por, edhe për këtë ekziston një zgjidhje.
“Nëse qeveria e njeh mësimin online si një alternativë zyrtare ndaj arsimit, veçanërisht për studentët që nuk mund të shkojnë në shkollë për disa arsye, atëherë pajisjet mund të gjenden sepse jemi një popullsi e vogël. Shumë organizata jofitimprurëse kanë dhuruar dhjetëra mijëra tableta për studentët në Shqipëri. Nga ana tjetër, ne kemi zhvilluar veçori që i lejojnë studentët të shikojnë mësimet tona video jashtë linje.”
I sapo diplomuari nga Harvardi na tregoi se si i shkuan studimet në dy prej universiteteve më të mira në botë.
“Unë pata fatin të merrja bursa të plota për të dyja diplomat e mia në Harvard dhe UCL, kështu që nuk pata presionin financiar për të ndjekur universitete të tilla prestigjioze. Për më tepër, të dy programet më ofruan fleksibilitetin për të punuar në ambiciet e mia sipërmarrëse gjatë kohës që studioja, për shembull Harvardi më lejoi të punoja në studime të pavarura që gjithashtu përfitonin nga startup-i im, kështu që ishte në rregull.”
Për fund, Dean Çelaj ka një porosi për të gjithë të rinjtë që dëshirojnë të ndjekin rrugen e tij, e veçanërisht për shqiptarët.
“Edhe pse mungesa e sotme e mundësive dhe mungesa e përgjithshme e konkurrencës, veçanërisht në sektorin e teknologjisë dhe inovacionit, po na shtyn të largohemi nga Shqipëria, mos e humbni shpresën dhe përpiquni gjithmonë të kontribuoni në një mënyrë ose në një tjetër. Shqipëria ka nevojë për ne! Ju mund të mbështeteni tek unë për të ndjekur gjithmonë ide dhe iniciativa të reja, ndaj mos ngurroni të kontaktoni dhe të punoni së bashku”, përfundon ai.
